PREGUNTAS E RESPOSTAS SOBRE A ELABORACIÓN
DO II CONVENIO
¿Que
foi o que se acordou nas asembleas celebradas nos tres campus no mes
de xaneiro?
Nas asembleas celebradas no mes de xaneiro os tres sindicatos que
conformamos o Comité Intercentros nos comprometemos a facer
unha proposta unitaria de Convenio; a elaborar o Convenio de todos
e de todas. A mensaxe que recibimos das asembleas foi o de sumar esforzos
para facer unha proposta unitaria.
A busca, polo tanto, da diferenza en vez do consenso, non se corresponde
co compromiso acadado ante a asemblea de traballadores e obedece máis
a estratexia dunha central que a conflictos de entendimento entre
as partes.
¿Que un sindicato tomara a decisión
de facer pública a súa proposta prexudicou o proceso
de elaboración do Convenio?
Enmarcado no proceso no que estabamos, sen dúbida foi un erro
e a xustificación perfecta para que quen estaba na Mesa coa
intención de buscar rendemento sindical tivera un motivo para
facelo. Non obstante, tamén hai que dicir, que unha vez superada
a sorpresa inicial, o feito de que os tres sindicatos fixeran públicas
as súas propostas enriqueceu o resultado final da proposta.
Non sabemos si se buscaba protagonismo sindical o que si aseguramos
é que esta dinámica non prexudicou o resultado final
do proceso.
¿É este un motivo xustificado
para romper a unidade sindical?
Malia ter pasado conflictos importantes a unidade sindical sempre
se salvagardou dentro do CI. Se agora se rompe é polo afán
que ten o sindicato minoritario de sacar o máximo proveito
a súa proposta, en detrimento da unitaria, confundindo a elaboración
dun Convenio cun proceso electoral.
¿É este o momento para
iniciar un proceso de funcionarización?
CC OO, de entrada, non se opón á funcionarización
de todo o colectivo laboral, mais, entendemos que ten que ser un proceso
unitario e global no que participen a Xerencia, os órganos
de representación e tódolos traballadores ou colectivos
afectados. A proposta de funcionarización feita por un só
sindicato non resulta crible; é coma se un partido político
propuxera unha constitución para un país. Hai procesos
que no seu nacemento, desenvolvemento e conclusión teñen
que ser necesariamente unitarios.
A funcionarización é un procedemento complexo que necesita
moito tempo por diante. Na Universidade de Alacante, por exemplo,
durou tres anos. En Zaragoza tamén se fixo en tres momentos
distintos. Para confirmar o que estamos a dicir só hai que
pensar que converter en persoal funcionario ao noso colectivo nos
obrigaría a poñer en marcha máis de corenta probas
distintas para facer o cambio, tal e como marca a lei. A Universidade
de Vigo non está neste momento preparada para afrontar unha
tarefa desta dimensión, no ano que lle queda a este xerente
non fariamos outra cousa. A un ano das eleccións a reitor esta
proposición nos parece que ten motivacións políticas
e que, sen dúbida, é interesada e extemporánea.
¿É a funcionarización
do PAS-L o problema máis importante que ten neste momento o
noso colectivo?
Semella que non. Sindicalmente hai outros problemas que son moito
máis importantes e que cómpre resolver con urxencia,
por exemplo:
• A inclusión de todo traballador
con contrato laboral nun Convenio Colectivo.
• Consolidar gran parte do emprego temporal existente coa creación
de novas áreas ou servizos e poñer freo a precariedade
laboral que se da na Universidade.
• O incremento e harmonización das retribucións.
• A conciliación da vida laboral e familiar.
Todos estes obxectivos se recollen na proposta
de Convenio. Centrar esta negociación na disxuntiva de cambiar,
ou non, a relación xurídico laboral do PAS-L é
separarse intencionadamente da realidade e, sen dúbida, un
desaire para todo o persoal que non ten un contrato fixo coa empresa.
¿Que proposta fai CC OO para que
o PAS laboral poida decidir se cambia ou non a súa relación
xurídico laboral?
A nosa proposta é neste momento negociar un Convenio unitario
con este xerente que salvagarde os dereitos de todo o persoal con
contrato laboral, e, tralas eleccións do ano que ven constituír
unha Mesa Técnica conformada por representantes da empresa
e dos órganos de representación que analice polo miúdo,
e con tempo, o que pode resultar favorable ou desfavorable dun cambio
de relación xurídica laboral coa empresa. Tamén
consideramos interesante a posibilidade de desenvolver a promoción
cruzada.
¿A xerencia actual está
a favor da funcionarización?
Boa pregunta. ¿Non si?. Na presentación da nova xerencia
lle fixemos esta pregunta ao actual xerente e a súa contestación
foi que o único que estaba disposto a facer era converter os
contratos laborais do persoal que ocupa postos de funcionarios en
funcionarios interinos. O que si nos consta é que a empresa
está a elaborar propostas para a negociación do II Convenio.
Un Convenio se negocia e se asina cun xerente. Esta é unha
máxima que teriamos que ter xa aprendido nesta universidade.
Empregar o ano escaso que nos queda en falar sobre os beneficios ou
prexuízos da funcionarización sería desaproveitar
a oportunidade real de mellorar as condicións laborais de tódolos
traballadores da Universidade de Vigo, oportunidade que neste momento
nos da a negociación colectiva e que sería unha irresponsabilidade
estragar.
¿Tiñamos que votar dúas
propostas de Convenio nas asembleas de abril?
Non foi ese o compromiso adquirido nas asembleas de xaneiro, o que
si se dixo foi que no caso de que non nos puxeramos de acordo nalgún
asunto o levariamos ás asembleas para que, por votación,
se resolvera o desacordo.
Este Convenio, por estar así pactado, o van negociar os sindicatos,
non o Comité Intercentros que tamén podería ser
un interlocutor válido, non obstante, as tres centrais sindicais
nos pareceu que o CI era o foro idóneo dende o que se podería
liderar e realizar todo o proceso. Non se trataba pois de que cada
sindicato presentara a súa proposta (que sería outra
opción posible) senón de consensuar unha proposta unitaria.
Emporiso, se un sindicato se levanta da mesa porque non quere participar
na busca do acordo e a súa pretensión é que se
vote a súa opción, contra a opción dos que seguen
defendendo a unidade sindical, se este últimos aceptan este
propósito estaría participando dunha estratexia espuria
contraria ao compromiso publicamente adquiridoen ditas asembleas xerais.
¿Segue sendo posible a unidade
sindical?
O que é difícil de explicar é que esta non se
dea cando estamos a falar de propostas que coinciden en máis
do noventa por cento. Semella que despois de todo o vivido á
UGT (ou ao seu delegado sindical) lle é mais rendible manterse
na "diferenza" que na unidade sindical.
¿O PDI laboral formará
parte deste Convenio?
Nos últimos días representantes das tres universidades
galegas acordaron negociar un Convenio propio para o PDI laboral de
ámbito autonómico tal e como xa se ten feito noutras
partes do Estado.
¿E o persoal acollidos ao programa
"Labora" e o contratado a través doutras administracións?
É intención dos sindicatos é, coma é sabido,
non excluír a ningún traballador con contrato laboral
deste(s) convenio(s). Na reunión celebrada o 6 de maio se lle
preguntou a empresa cal ía ser a súa posición
e a contestación que deron foi que o están estudando.
O
Grilo Dixital
